Доўгачаканая цырымонія ўзнагароджання пераможцаў і намінантаў конкурсу "Па-за кадрам: ад гісторыі сям'і да гісторыі супольнасці" адбылася 9 кастрычніка ў онлайн-фармаце.
Па колькасці гасцей і ўдзельнікаў/ц яна не саступіла іншым офлайнавым мерапрыемствам. У офісе DVVI Belarus сабраліся прадстаўнікі/цы міжнароднага журы.
У тым ліку:
- Алена Грыневіч, намесніца дырэктара Беларускага дзяржаўнага архіва кінафотафонадакументаў
- Андрэа Хутэрэер, рэдактар міждысцыплінарнага акадэмічнага штомесячніка Osteuropa
- Уладзімір Пучынскі, намеснік галоўнага рэдактара “Краязнаўчай газеты”
- Уладзімір Парфянок, фатограф, куратар выстаў, навуковы супрацоўнік музея-майстэрні З. Азгура
На онлайн-сувязі былі Андрэй Мастыка, каардынатар праекта «Беларускі архіў вуснай гісторыі», маладзёжнае грамадскае аб'яднанне «Гісторыка», а таксама Аляксей Братачкін, прадстаўнік Еўрапейскага каледжа Liberal Arts ў Беларусі (ECLAB).
Падзяліліся досведам правядзення гістарычных конкурсаў партнёры і арганізатары міжнароднага праекта: праграмны дырэктар EUSTORY Каця Фаузэр, праграмны мэнэджар EUSTORY Інка Сіут, загадчыца кафедры гісторыі і палітыкі фонда Кёрбера Габрыела Вайдэнкава з Германіі, а таксама Андрэй Ферт - каардынатар праекта “ Конкурс па гісторыі ў Беларусі, Грузіі, Малдове, Украіне 2.0” з Украіны.
У другой часцы нашай онлайн-сустрэчы адбылося абмеркаванне вынікаў конкурсу з членамі журы і куратарамі ўдзельнікаў. Многія работы аказаліся настолькі змястоўнымі, што будуць змешчаны ў “Краязнаўчай газеце”, а некаторыя фотаздымкі гатовы ўзяць на захаванне ў Беларускі дзяржаўны архіў кінафотафонадакументаў.
Усяго атрымалі ўзнагароды 25 работ. Шчыра віншуем усіх пераможцаў, намінантаў і іх куратараў, а таксама заклікаем не засмучацца, тых, хто сёлета не быў ацэнены журы - усе вы вялікія малайцы! Дзякуючы вам сямейная, лакальная гісторыя ўвайшла ў кантэкст гісторыі супольнасці і краіны.
Поўны спіс пераможцаў і намінантаў глядзіце па спасылцы.
Наверх
Друк