Адукацыя на працягу ўсяго жыцця: мадэльная праграма падрыхтоўкі андрагогаў

У 2011 г. завяршылася рэалізацыя праекта «Адукацыя на працягу ўсяго жыцця: мадэльная праграма падрыхтоўкі андрагогаў» (2010-2011) у межах Праграмы падтрымкі Беларусі (FpB). Праект ажыццяўляўся Прадстаўніцтвам ў супрацоўніцтве з ДУА «Акадэмія паслядыпломнай адукацыі» і быў накіраваны на павышэнне якасці адукацыйных паслуг у Беларусі. У рамках праекта былі рэалізаваны наступныя дзеянні:

  • Папярэдні аналіз сітуацыі ў сістэме адукацыі дарослых у РБ па пытанні падрыхтоўкі і патрабаванняў да кваліфікацыі выкладчыкаў. Былі прааналізаваны вучэбныя планы па педагагічных спецыяльнасцях, дысертацыйныя даследаванні, даступная вучэбна-метадычная літаратура, а таксама прадстаўлены агляд праектаў недзяржаўных актораў, якія ў той ці іншай форме прапануюць падрыхтоўку і / альбо павышэнне кваліфікацыі для спецыялістаў па навучанні дарослых. Вынікі аналізу былі прадстаўлены ў зводнай справаздачы, якая даступна шырокай грамадскасці на сайце Прадстаўніцтва ў раздзеле «Публікацыі». 
  • Правядзенне азнаямленчага візіту для групы беларускіх экспертаў у Польшчу (Варшава, Торунь, Гданьск) і міжнароднага круглага стала па пытаннях навучання андрагогаў. Для знаёмства з досведам трансфармацыі сістэмы адукацыі дарослых, а таксама вывучэння досведу польскіх універсітэтаў па падрыхтоўцы андрагогаў быў арганізаваны тыднёвы візіт для 8 беларускіх экспертаў, які завяршыўся круглым сталом з удзелам польскіх экспертаў па абмеркаванні прапанаванай структуры мадэльнага навучальнага курсу ў Беларусі.
  • Распрацоўка мадэльнай праграмы падрыхтоўкі андрагогаў ў сістэме ПК і ПК Беларусі і правядзенне двух навучальных курсаў для андрагогаў, складзеных на аснове распрацаванай праграмы. Быў распрацаваны навучальны план мадэльнага курсу ў сістэме павышэння кваліфікацыі на 40 вучэбных гадзін. Курс быў зацверджаны і апрабаваны на базе Акадэміі паслядыпломнай адукацыі ў форме пяцідзённага курсу для прадстаўнікоў сістэмы павышэння кваліфікацыі і трохдзённага семінара для практыкаў адукацыі дарослых з дзяржаўнага і недзяржаўнага сектараў. Абодва семінара прайшлі паспяхова і пацвердзілі актуальнасць тэмы праекта.
  • Публікацыя метадычных рэкамендацый і праграмы падрыхтоўкі андрагогаў у сістэма ПК і ПК. У апублікаваным дапаможніку «Мадэльная праграма падрыхтоўкі андрагогаў» прадстаўлены навуковыя, навукова-метадычныя, нарматыўныя і практычныя матэрыялы ў галіне арганізацыі і зместу адукацыйнага працэсу пры рэалізацыі дадатковай адукацыйнай праграмы павышэння кваліфікацыі андрагогаў – прафесарска-выкладчыцкага складу сістэмы дадатковай адукацыі дарослых і трэнераў ініцыятыўных адукацыйных праектаў для дарослых. Дапаможнік змяшчае 314 старонак і быў апублікаваны ў колькасці 300 асобнікаў. Публікацыю можна знайсці на сайце Прадстаўніцтва ў раздзеле «Публікацыі».
  • Правядзенне заключнага міжнароднага круглага стала, мэтай якога з’яўлялася прэзентацыя распрацаванай праграмы і апублікаванага выдання, а таксама абмеркаванне перспектыў далейшай прафесіяналізацыі адукацыі дарослых у РБ. У круглым стале прынялі ўдзел каля 70 прадстаўнікоў дзяржаўных устаноў адукацыі, навукова-даследчых устаноў, камерцыйных цэнтраў АД і грамадскіх асветніцкіх арганізацый, СМІ, а таксама замежныя эксперты з Германіі, Сербіі, Украіны і Малдовы.  

Распрацаваная мадэльная праграма падрыхтоўкі андрагогаў была зацвержана навуковым саветам ДУА «Акадэмія паслядыпломнай адукацыі» і ўключана ў план Акадэміі на 2012 г. у якасці курсу павышэння кваліфікацыі. Дзякуючы ўдзелу прадстаўнікоў дзяржаўных і недзяржаўных арганізацый у апрабацыі мадэльнай праграмы сфарміравалася сетка мультыплікатараў, здольных і гатовых садзейнічаць развіццю і распаўсюджванню культуры навучання дарослых ў самых шырокіх адукацыйных колах Беларусі.

Кантактная асоба

Глава Прадстаўніцтва

Галіна Верамейчык

+375(17) 207 98 35
veramejchyk@dvv-international.by